قالب النسكافيه بالكرامل والشيكولاته

قالب النسكافيه بالكرامل والشيكولاته
سهلة جداً ... مش عايزة حجج .. وعايزه تجارب ..

أنا شفت حاجة شبه كده فى التليفزيون بس كانت بالبسكويت ...
وكنت عايزة اعمل حاجة حلوة فى السريع فقمت عملت الأختراع ده ...
شوية من التليفزيون وشويه من فتكات ...

المقادير
كيك ساده أو بالشيكولاته تكون عندك أو تشتريها جاهزة مش مهم ...
2 كيس كريم شانتى
1 علبه كريم كرامل جاهزة

كوب ماء + 3 ملاعق صغيرة نسكافيه (بدون سكر)

صوص شيكولاته بتاع الشاتوه ....
كوب لبن + كوب سكر + 3 ملاعق كاكاو خام + ملعقة صغيره نسكافيه + نصف كوب زيت عباد

الطريقة
أضربى الكريم شانتى + بودرة الكريم كرامل ...

الحركة دى عمرنا عملتها فى تورتة ريش الطاووس ...
وبصراحة طعمها حلو قوى ... ولونها أصفر فاتح جميل
أعملى صوص الشيكولاته ...بضرب كل المكونات فى الخلاط ثم صب الزيت ببطء ...
قطعى الكيكة ورصيها فى قالب عميق ..
واسقى الكيك بالنسكافيه ....لو مش بتحبى النسكافيه أسقيها بالكاكاو
حطى كريمة وصوص الشيكولاته فوق الكيك....زى الصورة



رصى طبقة أخرى من الكيكة وكررى العملية السابقة
ممكن تعملى طبقتين أو ثلاثة حسب عمق الطبق ...

الطبقة الاخيرة ... غطيها بصوص الشيكولاته ...



ثم زيني الوجه بوردات من الكريمة ...
افتحى كيس الكرامل وحطى نقطة على كل وردة ...حركة جامدة وطعمها حلو قوى
أو ممكن تحطى مكسرات أو تسيبها ساده ...
أنا عارفه الوردة شكلها مش حلو قوى...
المرة الجاية تبقى أحسن ...



ممكن كمان تعمليها فى كأسات منفصلة ... بتبقى حلوة قوى برضه ...
الطعم أخباره ايه ؟؟؟
نسكافيه وشيكولاته ... خيال ياناس ...

زائرنا الكريم : رجاءآ لاتنسى الاشتراك بقناتنا تشجيعآ لنا لتقديم الافضل وحتى يصلك كل جديد

  

شكرا لك .. الى اللقاء 

*

*